شذرات من اغنَ الأديب الكبير احمد ولد اواه اواه

شذرات من اغنَ الأديب الكبير احمد ولد اواه اواه

لااتْواسِ شِ مَايَنْفعْ :: ماايعودْاعليكْ ابْحسْنَ
اولاَاتْگولْ افلانَ تخْلعْ :: اولاَاتْگولْ افْلانْ ادْحسْنَ

اولاَاتْردْ اعْلَ حدْ اخْبَارْ :: كونْ وَحدَ عَنْدَكْ تِنْدَارْ
لااتْمِنْ ؤُعِسْ امْنْ العارْ :: عودْ عَيْنْ اوْعودْ اكْيسْنَ
اوْعُودْ عَارِفْ عَنْ عيْشْْ انهارْ :: ماايدِلْ اعلَ عيشْ اسْنَ

اوْلاَ اتزلْ اعلَ حدْ اكبيرْ :: اوعودْ حدْ امنْ اهلْ التّدْببرْ
اولاَاتْحامِرْ فِعْلْ اسغيّيرْ :: تَمْ عسْ امْنْ اَهلْ اللّسْنَ
اوْلاَاتْعُودْ اعلَ حدْ الدّير :: اولا اتحصلْ ماهُ حسنَ

اولااتعودْ امْنادمْ مطفوگْ :: عودْ حاذكْ مَانَك مبلوگْ
ذاكْ گاعْ الواعدْ ملْحوگْ :: عودْ زادْ افْطَبعْ املَسْنَ
مدْ بايْدَكْ عِسْ امنْ الشّوگْ :: طِيبْ عِسْ امنْ اتْبَخسْنَ

لاَاتْنَعّتْ ضِعفكْ للنَاسْ :: تمْ زاَدْ اعلَ راصَكْ عاسْ
لِينْ زَيّنْ طَبْعَكْ بامْلاَسْ :: لااتهابْ الّ نَقّسْنَ
لاَاِطّرىِ شَرْ اوْ لاَبَاسْ :: اوْكَانْ گلْنَ لاَ تَعكسنَ

اوْلا اتْجاوبْ حدْ إلَ گْالْ :: صادْ شوركْ شِ ماينگْالْ
حوزْ عنّو بِالشّورْ اگْبالْ :: ذَاكْ بيهْ اتْعودْ اسْيَسنَ
اوْلاَاتعودْ امن ْ اعبيدْ المالْ :: اوْلاَاتْعودْ امنْ اَفلسنَ
اولااتواس شِ ماينفعْ :: ماايعود اعليك ابحسنَ
اوْلا اتْگْولْ افلانَ تخلعْ :: اولاَ اتْكولْ افلانْ ادْحَسْنَ

احذرْ منْ يمْ ايْجِرْ ذَمْ :: ماهُ كاردْ وِجهْ اسگْمْ
لاَتَگْبَظْ گْاعَ الْحَدْ يمْ :: جاَيِبْ مُوجِبْ تِكْدَارُ
وِيلَ دَارَكْ بِالْخَيْرْ تمْ :: افْمَدارُو لَدَا رُو
وَالٍ دَارَكْ بِالشّرْ فَمْ :: عنوٌ وامْرِگْ مَدَار
عِسْ امنْ اتْعادِى ولْ عمْ :: واللً تِنْگصْ مِقدارُ
والزٍرْقْ اتْخَوْمَ لاايْفوتْ :: عمركْ فاگبيظْ اخبارُ
وِاصْبرْ واعْرَفْ عَنْ ما ايموتْ :: إل ماصابْ انْهَارُ

عِسّكْ مِنْ عِزّتْ شِ وارْعَاكْ :: خَلىِ حگللّ عَنّكْ ذَاك
خاوى خَلْقَك وِالْما خَواكْ :: ذاكْ الاّواَسيهْ أخوّكَ
وارْفَقْ بَلّ مِنْ خَلْقْ امْعَاكْ :: واَسِيلُو طِرگكْ مَدْهُوكَ
لاَتنْسَ ذاكْ الْمَايَنْسَاكْ :: فِارْخاكْ اوّقْتْ الْمَبْرُوكَ
لاَتَطْمَعْ باشْ اِيْتِمْ اغْلاَ كْ :: واِتّمْ الْخَيْمَه مَسْموكَ
دِينَكْ وِامْرُوتَكْ تِتْحَرّاكْ :: لِعْگوبَ بِيهمْ مَجْروكَ
لاَتِسْمِى حدْ اوْحَدْ اسْمَا كْ :: دَارِيهْ ابْصِيفَ مَحْبُوكَ
ُؤلِمُورْ اوْهَاذِ لاَ تَخْفاكْ :: محْبُوكَه وَللَّ مَتْرُوكَ
مِدْ ايْدَكْ وِاتْلِبْهَ عَفَاكْ :: عِسْ امْنْ الْكِشْفَه مَهْلُوكَ
خَبْركْ لاَهِ يِرْتَدْ اوْ رَاكْ :: لَخْبارْ اِمّلىِ مَدْ رُوكَ
وانْتَ مِلْكْ الْمالِكْ لَمْلاكْ :: وِالدٍنْيَ كِيفَكْ ممْلُوكَ
وِالْخَلْقْ الاً ذِي صِيفاتوُ :: جامِلْهُمْ يُجامِلوكَ
عَامِلِ الناًسَ بِما تُ :: حِبّو أنْ يُعَامِلوُكَ